蕎蕎 の成長日誌

媽媽拎衫去沖涼時...

蕎: [媽媽未死(洗)呀?!]

媽: [係..媽媽未死呀!!]

媽媽沖完涼出黎.....

蕎: [媽媽死(洗)左啦~~出黎啦..YEAH!!]

媽: [媽媽未死呀!!!]

不過話時話, 點解唔係講未沖涼而係講未洗架呢?!

係囉...我點知點解喎!!

某日上完PG後落樓見到同學仔,

佢指住個同學仔同我講 : [嘉嘉呀~~~]

媽: [係喎, 你同學喎~不過佢叫嘉嘉咩?!] (頭先明明聽到MISS叫呢位小朋友做Rachel架?!)

蕎: [係(好肯定甘點頭)!!係叫嘉嘉!]

媽: [M..佢唔係嘉嘉喎, 媽咪聽到佢個名叫蕎蕎喎, 英文名叫Rachel喎~]

蕎: [唔係呀, 佢唔係叫蕎蕎呀~ 佢係嘉嘉呀!!我先叫蕎蕎呀~]

媽: [但佢真係叫Rachel呀, 中文名叫蕎蕎, 同你一樣架~]

蕎: [(尷尬地傻笑)哦, Rachel呀, 佢叫Rachel]

甘佢又真係有個同學叫[嘉嘉], 不過唔係呢個囉~

真係比佢激死, 成日記錯哂d朋友仔D名..XD

咩0者, 記錯左之麻, 無記錯自己個名咪得囉....

某日夜晚, 有人又唔想食飯, 要落地玩....

蕎: 蕎蕎唔食飯, 要落地~

媽: 唔得, 食埋先~

蕎: ...... 我要痀尿, 要落地!!

媽: 又扮野, 食埋呢啖先準去!!

蕎: 我好急, 要痀尿!!

媽媽繼續唔彩佢....

蕎: 我要痀尿, 賴尿啦!!

我同爸爸聽到即刻另轉面笑~

佢D語氣真係勁好笑 XD

好野~~成功啦!!(蕎蕎口頭嬋)

爸爸公司同事今年約左年初五上Bella屋企團拜~

本來我要放工後自己過去既, 點知今年老闆話年初六先開工~

所以我地就可以一家3口一齊過去啦~

上去前出左去尖沙咀海港城行街~

當日海港城有古古力FUNCTION, 有好多得意既擺設~

之後就上去爸爸同事屋企開PARTY~

當日既晚餐非常豐富, 但係忘記影相~

好彩食飽都仲記得同2位小朋友影下相0者~

呢位係屋主個女 - 琦琦小妹妹~ 當日蕎蕎同佢玩得好開心呢~

蕎蕎餵BB個樣似模似樣甘喎, 將來可以幫爺爺嫲嫲手餵細佬B啦~

蕎蕎最鐘意就係踩住爸爸上去摸天花板, 好似玩飄式甘, 哈哈~

唔知同爸爸玩緊咩, 玩到鄒哂眉~

真係多謝bella一家既招待, 當日蕎蕎玩得好開心, 好唔想走添呀~

農曆新年既活動

年初一

蕎蕎一早同爸爸媽媽拜年~

我地再係屋企玩陣等爺爺嫲嫲飲完茶返黎就上婆婆屋企拜年~

夜晚就返屋企同爸爸個邊既親友食飯~

 年初二

 入南丫島同太婆拜年~

今年與往年唔同, 我地入完南丫島後再去馬鞍山拜年~

蕎蕎就最好開心, 因為又可以見到孖B表姐~

夜晚我地就返婆婆屋企食飯, 但妹夫架車唔夠位坐, 原本我地一家三去搭巴士既~

點知3個小人原本好開心手拖手行緊時突然叫佢地分開~

3個小人個樣都勁唔捨得, 婆婆見到唔忍心, 最後佢就同舅母去左搭巴士啦~

以前分離唔會甘依依不捨架, 而家大左D, 每次同表姐分開都好唔捨得呢~

年初三

我地第一次見細佬B, 不過蕎蕎唔太興奮, 可能細佬B仲細, 未識同佢玩啦~

出去吉吉島幫細佬B買野時, 見加錢可以換購一隻公仔, 爸爸見平就換隻比蕎蕎玩~

蕎蕎緊係好開心攬住啦~連去廁所都要拎住, 結果就出事啦!

因為..佢小便完後, 唔小心張隻跳跳虎跌左落屎塔, 仲要未沖水!!

好彩係係細佬B屋企, 我即刻執番再搵水洗一次先, 番到屋企爸爸再拎去消毒!

所以..食飯時跳跳虎就比個透明膠袋袋住左啦~

蕎蕎見我地影得甘開心, 又要跟住影~

年初四

我地去左[佐敦谷公園]玩~

呢個公園新起既, 所以所有設施都好新, 好乾淨~

地方又大, 仲有個大草地添, 下次要約埋孖B表姐黎先得~