- Mar 24 Thu 2011 12:12
日常對話 - 未死呀~
- Mar 18 Fri 2011 10:09
同學仔
某日上完PG後落樓見到同學仔,
佢指住個同學仔同我講 : [嘉嘉呀~~~]
媽: [係喎, 你同學喎~不過佢叫嘉嘉咩?!] (頭先明明聽到MISS叫呢位小朋友做Rachel架?!)
蕎: [係(好肯定甘點頭)!!係叫嘉嘉!]
媽: [M..佢唔係嘉嘉喎, 媽咪聽到佢個名叫蕎蕎喎, 英文名叫Rachel喎~]
蕎: [唔係呀, 佢唔係叫蕎蕎呀~ 佢係嘉嘉呀!!我先叫蕎蕎呀~]
媽: [但佢真係叫Rachel呀, 中文名叫蕎蕎, 同你一樣架~]
蕎: [(尷尬地傻笑)哦, Rachel呀, 佢叫Rachel]
甘佢又真係有個同學叫[嘉嘉], 不過唔係呢個囉~
真係比佢激死, 成日記錯哂d朋友仔D名..XD
咩0者, 記錯左之麻, 無記錯自己個名咪得囉....
- Mar 15 Tue 2011 18:45
賴尿啦!!
- Mar 13 Sun 2011 17:50
團拜@年初五(2011)
爸爸公司同事今年約左年初五上Bella屋企團拜~
本來我要放工後自己過去既, 點知今年老闆話年初六先開工~
所以我地就可以一家3口一齊過去啦~
上去前出左去尖沙咀海港城行街~
當日海港城有古古力FUNCTION, 有好多得意既擺設~
之後就上去爸爸同事屋企開PARTY~
當日既晚餐非常豐富, 但係忘記影相~
好彩食飽都仲記得同2位小朋友影下相0者~
呢位係屋主個女 - 琦琦小妹妹~ 當日蕎蕎同佢玩得好開心呢~
蕎蕎餵BB個樣似模似樣甘喎, 將來可以幫爺爺嫲嫲手餵細佬B啦~
蕎蕎最鐘意就係踩住爸爸上去摸天花板, 好似玩飄式甘, 哈哈~
唔知同爸爸玩緊咩, 玩到鄒哂眉~
真係多謝bella一家既招待, 當日蕎蕎玩得好開心, 好唔想走添呀~
- Mar 10 Thu 2011 18:06
農曆新年@2011
農曆新年既活動
年初一
蕎蕎一早同爸爸媽媽拜年~
我地再係屋企玩陣等爺爺嫲嫲飲完茶返黎就上婆婆屋企拜年~
夜晚就返屋企同爸爸個邊既親友食飯~
年初二
入南丫島同太婆拜年~
今年與往年唔同, 我地入完南丫島後再去馬鞍山拜年~
蕎蕎就最好開心, 因為又可以見到孖B表姐~
夜晚我地就返婆婆屋企食飯, 但妹夫架車唔夠位坐, 原本我地一家三去搭巴士既~
點知3個小人原本好開心手拖手行緊時突然叫佢地分開~
3個小人個樣都勁唔捨得, 婆婆見到唔忍心, 最後佢就同舅母去左搭巴士啦~
以前分離唔會甘依依不捨架, 而家大左D, 每次同表姐分開都好唔捨得呢~
年初三
我地第一次見細佬B, 不過蕎蕎唔太興奮, 可能細佬B仲細, 未識同佢玩啦~
出去吉吉島幫細佬B買野時, 見加錢可以換購一隻公仔, 爸爸見平就換隻比蕎蕎玩~
蕎蕎緊係好開心攬住啦~連去廁所都要拎住, 結果就出事啦!
因為..佢小便完後, 唔小心張隻跳跳虎跌左落屎塔, 仲要未沖水!!
好彩係係細佬B屋企, 我即刻執番再搵水洗一次先, 番到屋企爸爸再拎去消毒!
所以..食飯時跳跳虎就比個透明膠袋袋住左啦~
蕎蕎見我地影得甘開心, 又要跟住影~
年初四
我地去左[佐敦谷公園]玩~
呢個公園新起既, 所以所有設施都好新, 好乾淨~
地方又大, 仲有個大草地添, 下次要約埋孖B表姐黎先得~
- Mar 09 Wed 2011 17:47
海洋公園(27/12/2010)
海洋公園@2010
同往年一樣, 聖誕節過後就去海洋公園玩~
都係睇下蕎蕎鐘唔鐘意, 如果鐘意既先買年票~
我地一入去就見到有聖誕老人企係度同人影相~
蕎蕎開頭見到都大叫:[聖誕老人呀]
點知企埋一齊影相時就面有難色啦~
影完問佢係唔係驚, 又答: [蕎蕎唔驚]...又講大話
見到熊貓館, 諗住入去睇左先, 開頭蕎蕎都話要去睇熊貓, 點知去到門口就係都唔肯入去,
仲想喊添, 甘唯有改變行程, 去玩[環迥水世界]先~
終於排完隊, 蕎蕎一早揀左要坐MO仔, 原本我地以為好似木馬甘, 爸爸可以企係隔離扶佢啦, 點知工作人員唔比, 要我地揀雙人坐位玩~
但蕎蕎唔肯, 佢好想坐MO仔, 竟然佢唔肯坐第2架, 唯有同佢講唔玩得, 費事阻住人啦~
之後坐吊車上山, 再去餐廳食野~
食飽就去海洋館~今年就叻過上年, 睇魚途中無再話驚驚要走啦~
去完海洋館, 我地再去[中華鱘館]之後就落山啦~
係海洋列車出面有觀景望遠鏡, 兩父女係度扮哂野睇風景~
落山後我地再嘗試入熊貓館, 順利入左館, 不過蕎蕎一見熊貓就話驚要走啦~
但見到呢隻假熊貓又話要影相~
一出門口就見比人寫願望既花燈, 蕎蕎即刻走去畫~
未入[金魚寶殿], 係門口見到盆金魚都可以甘開心~
又話驚熊貓, 但又要買熊貓公仔, 仲話要買最大個隻~ 唔好掛, 影張相咪算囉~~
不過最後都買左隻比佢, 之後就堅持要自己拎住個膠袋周圍行~
影相都唔肯放底~
去波波池玩都唔放~
今次去實在太多人, 本來想去睇[天上王者], 不過未夠鐘已經爆左~
最後都係提早走人啦~
之後問蕎蕎: [今日開唔開心呀?!]
蕎: [開心]~
媽: [甘下次再黎好唔好?!]
蕎: [(諗左陣) 好!!]
媽: [好呀?!甘下次我地再黎探熊貓啦~]
蕎: [唔好啦~唔黎啦!!]
媽:[下?!甘頭先你又話好玩既?!]
蕎: [唔黎啦, 蕎蕎驚熊貓呀~]
甘好啦~今年仍然慳番唔買年票住啦..